Тұрақтандыру қорындағы картоп өнімі 44 сауда нүктесінде арзан бағада сатылып жатыр

2024 жылы тұрақтандыру қорына барлығы 5 667 тонна көкөніс жеткізілді. Өнімнің 1 863 тоннасы — картоп. Қазір ондағы картоптың бағасы 180 теңге,- деп хабарлайды Өңірлік коммуникациялар қызметі. 

Бүгінге дейін картоптың 1400 тоннадан астамы сатылған. Қалған өнім ақпан айының аяғына дейін жеткілікті. Ал көктемгі кезеңге «Атырау» ӘКК» АҚ жергілікті ауыл шаруашылығы тауарын өндірушімен төмендетілген бағамен 680 тонна өнім алуға қосымша шарт жасасты. 

- Шарттарға сәйкес әлеуметтік маңызы бар көкөністер 2024 жылдың 1-ші қарашасы мен осы жылдың наурызына дейін сатылады. Олар қаладағы үш базар, 32 супермаркет және алты сауда павильонына жеткізіледі. Ал Мақат, Доссор, Индер және Махамбет аудандарына «Отбасы» шаруа қожалығының тасымалдауымен аптасына бір рет жіберіліп тұрады. Осыған сәйкес тұрақтандыру қорынан шыққан картоп өнімі ауданда да тұрақты бағада сатылмақ,- деді “Атырау” ӘКК” АҚ департамент директоры Қайсар Құрманалиев.

Айта кетейік, әлеуметтік маңызы бар тауарлар «Дина», «Көктем», «Сарайшық» базары мен «Лидер», «IDEAL», «Paida market»  супермаркеті мен алты сауда повильонында сатылады.