Атырауда "Қасым хан" тарихи драмасы сахналанды

Махамбет атындағы академиялық қазақ драма театрында  "Қасым хан" тарихи драмасының премьерасы өтті,- деп хабарлайды Өңірлік коммуникациялар қызметі.

Спектакль белгілі драматург Асылбек Ихсанның шығармасы негізінде қойылған. Режиссері Елік Нұрсұлтан Алматы қаласындағы М. Әуезов атындағы қазақ ұлттық драма театрынан арнайы шақыртылыпты.

-  Туынды тарихи оқиғаларды ғана емес, Қасым ханның тұлғалық қасиеттерін, оның шынайылығы мен адалдығын, отансүйгіштігі мен батылдығын көрсетуге бағытталған. Біз тарихқа емес, Қасым ханның адамгершілік қасиеттеріне басымдық бердік. Қойылым көрермендерге ұнады деп сенеміз. Себебі барша көрсетілген құрмет мен соғылған шапалақта шек жоқ,- деді режиссер Е.Нұрсұлтан.

Тарихи драманы тамашалауға келгендердің қарасы қалың, зал лық толы болды. Тіпті басқа өңірден де көрермен келген.

- Осындай қойылымдар әлі де жалғасын таба берсін. Көзімізге жас келіп, тіпті уақыттын қалай өткенін де байкамай қалыппыз,-деді көрермен Айдарбек Шагиров.

Айта кетейік, спектакль 7 желтоқсан күні де сахналанады.