Робот жасаушылар бұл жобаны іске асыру үшін екі ай жұмыстанған.

JOO High school-дың 10-сынып оқушысы  Нұрсұлтан Қалымжан,  Д.Қонаев атындағы Binom мектебінің 9-сынып оқушысы Парасат Сакишев және Ж.Досмұхамедов атындағы мамандандырылған мектеп-лицейінің 8-сынып оқушысы Ануар Әмірбек  «JasUP» жобасында бас қосып, робот жасады, - деп хабарлайды Өңірлік коммуникациялар қызметі.

Оқушылардың туындысы KazRoboSport додасында 2023-2024 жылдары кіші сумо категориясында жеңімпаз атанған. 

Робот жасаушылар бұл жобаны іске асыру үшін екі ай жұмыстанған. 

- Роботтар жапондық сумо күресінің кішірейтілген түрін көретеді. Қарсыласын жан-жағындағы алты датчик арқылы сезеді. Арнайы алаңда ең қысқасы 1-2, ең ұзағы 5-10 секундта қарсыласады.Салмағы 500 граммнан аспайды. Ішіндегі қозғалтқышын, датчиктерін Түркиядан тапсырыспен алдырдық. Сыртқы материалдарын 3D принтермен өзіміз жасап, барлығын құрастырдық, - деді Н.Қалымжан.

Айта кетейік, қазір  “Теңізшевройл” ЖШС-нің әлеуметтік-инвестициялық бағдарламасы аясында «JasUP» жобасы жұмыс жасауда.  Мұнда жыл басынан бері 41 шеберлік сағаты, 7 ғылыми-техникалық жарыс және 6 курс өткізілген. Жоба шеңберінде ақпан-желтоқсан аралығында 3000-нан астам жас қамтылған.