Махамбет ауданында әскери оқу-жаттығу өтті

Махамбет ауданында «КазТрансОйл» АҚ Атырау мұнай құбыры басқармасы «Карманова» мұнай жылыту стансасы маңында, «Атырау облысы аумақтық қорғаныс бригадасының әскери міндеттемелерімен әскери оқу-жаттығу жиынының» тактикалық эпизоды өтті. Оқу жаттығу жиынына Атырау облысы әкімінің орынбасары Қайрат Нұртаев қатысты. Бұл туралы Өңірлік коммуникациялар қызметі хабарлайды. 

Іс-шарада аймақ басшысының орынбасары арнайы тактикалық оқу-жаттығуды өткізіп, белсенділік танытқан лауазымды тұлғалар мен әскери міндеттілерді оқу-жаттығуды сәтті орындап шығуларымен құттықтап, жоғары тәртібі мен қызметтік міндеттерін үлгілі орындағаны үшін алғыс хатпен марапаттады. 

- Бейбіт заман аспанында күніміз атқанымен, әскери қызметкерлер кез-келген оқыс оқиғаға дайын болуы керек. Бүгінгі оқу-жаттығу жиынының мақсаты да сол. Ел басына күн туса, бірінші кезек қатарында осындай әлеуметтік маңызы бар нысандардың күзеті күшеюі тиіс. Дәл бүгінгідей әскери форма киіп, тек оқу-жаттығуда кездесейік. Отанға деген адал қызметтеріңізге алғыс, -деді Қ.Нұртаев. 

Оқу-жаттығу кезінде содырлардан құралған екі топ Карманова мұнай жылыту станциясы маңына өрт қойып, шабуыл жасады. Кейін төтенше жағдайдың орын алғандығы жөнінде хабарланып, блокбекет күзет ротасымен күшейтілді. Пикап көлігін тізгіндеген содырлар қос бағытта шабуыл жасады. Жараланған әскери қызметкерлер үшін шұғыл жедел жәрдем шақырылды. Жеке құрам ұрыс алаңында арнайы түтін гранаталарын пайдаланып, көру ықтималдылығын азайтты. Сол сәтте жедел әрекет ету жасағы (СОБР) содырларды, жеке құраммен бірге қоршауға алып, қашуға бет алған көлікті, Полиция департаментінің арнайы құрамы тоқтатып, содырларды тұтқындады. 

Іс-шара кезінде жедел жәрдем қызметкерлері мен өрт сөндіруші мамандар да ширақ қимыл көрсете білді. 

Арнайы тактикалық оқу-жаттығу жауынгерлердің әскери марштағы салтанатты шеруімен аяқталды.