Атырауда «Жыл кәсіпкері - 2022» байқауы қорытындыланды

Атырауда шағын және орта кәсіпкерлікті дамытуда жетістіктерімен дараланған сала үздіктері марапатталды, деп хабарлайды Атырау облысы Өңірлік коммуникациялар қызметі.  

фото: Атырау облысының Өңірлік коммуникациялар қызметі.

Салтанатты шараға қатысқан облыс әкімінің орынбасары Қайрат Нұртаев өңірдің экономикасын дамытуға үлес қосып жүрген кәсіпкерлерді марапаттады. 

фото: Атырау облысының Өңірлік коммуникациялар қызметі.

- Мемлекет басшысы Қасым-Жомарт Кемелұлы: «Азаматтарымыз нақты оң өзгерістер бүгін және қазір болады деп үміттеніп отыр. Осы үміт пен сенімді ақтау – алдымызда тұрған ең басты міндет әрі қастерлі парыз»,- деп атап көрсетті. Сол себепті кәсіпкерлікті қолдау мемлекет саясатының ең негізгі бағыттарының бірі. Біздің өңірімізде бизнеске мейлінше қолайлы жағдайлар туғызу, бизнес-климатты жақсарту, жаппай кәсіпкерлікті дамыту бағытында қарқынды шаралар атқарылып келеді. Жыл сайын облысымызда мемлекеттік және жергілікті бағдарламаға қатысушылардың, соның ішінде ауылдық жерлердегі кәсіпкердің саны артып, нәтижесінде бюджетке түсетін салық көлемі артты. Жұмыс орындары ашылып, жаңа нысандар іске қосылды. Осы ретте облысымыздан үздік деп дараланған кәсіп иелерін бүгінгі жеңісімен құттықтай отыра, еңбектеріңізге жеміс, табыстарыңызға береке, кәсіптеріңіздің нәсібін көрулеріңізге тілекшімін,-деді Қайрат Нұртаев. 

 «Жыл кәсіпкері - 2022» өңірлік байқауына қатысу үшін Атырау облысы бойынша 21-30 қараша аралығында 123 өтінім келіп түскен.  

 Солардың бірі - құрманғазылық Азамат Хабибуллин, «Құралай» нан-тағам комбинатының иесі. Ол бұл байқауға қатысуға алғаш рет өтінім берген. 24 жастағы Азамат Хабибуллин «Үздік жас кәсіпкер» номинациясының жеңімпазы. 

 - Бизнеске 2017 жылы келдім. Содан бері Құрманғазы ауданының 60%-н нан-тоқаш өнімдерімен қамтып отырмыз. 16 округтегі 100-ден астам азық-түлік дүкеніне күнделікті пештен шыққан нан тағамдарын балғын күйде жеткіземіз. Бүгін міне үздіктер қатарынан көріндім. Еңбегімнің еленіп, елдің алғысын алып жатқаныма қуаныштымын. Мұндай байқаулар жиі ұйымдастырылса, біз сияқты жас кәсіпкерлерді ынталандыратыны сөзсіз,-делі А.Хабибуллин. 

 Өтінім нәтижесінде бірқатар номинациялар анықталып отыр. Олардың ішінде «Үздік жас кәсіпкер» номинациясымен Құрманғазы ауданынан «Хабибуллин АС»  ЖК директоры Азамат Хабибуллин, «Үздік сәтті старт» номинациясымен Атырау қаласының «Риза», «Булки Хауз» ЖК директоры Ұлболсын Ерубаева, «Үздік қызмет саласы» номинациясымен Исатай ауданының «Игілік» ЖК директоры Нұркен Ғайдаров марапатталды.  

Сондай-ақ «Үздік әйел кәсіпкер» номинациясы бойынша Атырау қаласынан «Избасова Б.А» ЖК директоры Бибігүл Ізбасова, «Үздік отбасылық бизнес» номинациясы бойынша Қызылқоға ауданынан «Серик» ЖК директоры Серік Ажайпов, «Үздік сауда саласы» номинациясы бойынша Махамбет ауданынан «Алишер» ЖК директоры Әлішер Таңатарұлы марапатталды.  

Ал «Үздік өндіруші» номинациясын махамбеттік «Дастан» ШҚ директоры Қоныс Ерманов, «Жыл кәсіпкері» номинациясын «Sultan Palaсe Hotel»  ЖШС құрылтайшысы Гүлнар Жолмұханова, «Туризм саласының үздігі» номинациясын «Нұрлы-Тал» ЖШС директоры Гүлжан Күзекешова, «Үздік екінші деңгейлі банк» номинациясын «Еуразиялық банк»  АҚ АФ директоры Әлия Өтепқалиева алды.