Қызылқоғаның дәрігерлік амбулаториялары медициналық автокөліктермен қамтамасыз етіледі

Бұл туралы аудан әкімі Қанат Әзмұханов «Қызылқоға ауданының әлеуметтік-экономикалық дамуы» туралы брифингте мәлім етті, деп хабарлайды Атырау облысы Өңірлік коммуникациялар қызметі.

Аудандағы ауылдық округтердегі дәрігерлік амбулаториялар келер жылы 7 санитарлық автокөлікпен және 3 медициналық автокөлікпен қамтамасыз етіледі. 

Ауданда 1 аурухана, 8 дәрігерлік амбулатория, 1 фельдшерлік-акушерлік пункт және 6 медициналық пункт жұмыс жасайды. Осы жылы ауданымыз 2 хирург, 2 жалпы тәжірибелік дәрігер және УЗИ дәрігерімен толықты. Аталған қызметке келген дәрігерлер тәжірибелі мамандар. Алайда әлі де болса денсаулық сақтау саласындағы негізгі проблемалық мәселе ол - кадр тапшылығы. Осы мәселені шешу үшін облыстық денсаулық сақтау басқармасына және өз оқуларын аяқтағалы тұрған жас мамандарға өз ұсынысымызды білдіріп, ауданымызға қызмет етуге шақырудамыз. Ауданға білікті, білімді мамандар ауадай қажет, - деді Қ. Әзмұханов.

Аудан әкімі медициналық қызмет көрсету сапасын арттыру мен халыққа уақытылы медициналық көмек көрсету мақсатында «Компьютерлік томография» жабдығымен қамтамасыз етуге сұраныс берілгенін жеткізді. Сондай-ақ аудан тұрғындарына қолайлы болу үшін тағы бір медициналық пункттің құрылысы басталғанын атап өтті. Айдын елді мекенінде басталған құрылыс жұмысы келер жылы аяқталып, тұрғындардың игіліне беріледі деп жоспарлануда.