Қарабау ауылында 120 орындық бастауыш мектеп салынбақ

Бұл туралы Қызылқоға ауданының әкімі Қанат Әзмұханов мәлім етті, деп хабарлайды Атырау облысы Өңірлік коммуникациялар қызметі.

Қарабау ауылында 120 орындық бастауыш мектеп салу үшін жоба жасақталған. Одан бөлек, Ойыл ауылынан 100 орындық, Тайсойған елді мекенінен 50 орындық балабақша салу жобасы жасақталып жатыр.

Қызылқоға ауданының білім беру саласында аудандық әдістемелік орталық, 12 балабақша, 19 мектеп және 4 қосымша білім беру мекемелері жұмыс жасайды. Аудан бойынша 1-6 жас аралығында балалардың мектепке дейінгі ұйымдармен қамтылу көрсеткіші  87 пайыз, 3-6 жас аралығындағы балаларды қамту 100 пайызды құрайды.

 -Биыл Қарабау, Қаракөл және Сағыз ауылындағы №9 орта мектеп модернизациядан өтті. 2023 жылы Б.Аманшин, Ы.Шөреков және Ш.Еркінов атындағы орта мектептері модернизациядан өтеді. Сондай-ақ Жангелдин ауылындағы Миялы орта мектебі күрделі жөндеуден өтіп жатыр,- деді Қ.Әзмұханов.

Аудан әкімінің айтуынша, биылғы оқу жылын 416 түлек аяқтап, оның 207-і жоғарғы оқу орындарына түсіп, 115-і мемлекеттік грантқа ие болған. Ал 227 бала республикалық және халықаралық байқауларға қатысып, 152 бала жүлделі орындарға ие болып отыр. Сондай-ақ ауданда «Ұлан-балалар жасөспірімдердің дене шынықтыру даярлығы клубы» ашылып, мектеп оқушыларын спортқа баулуда.